Partneriteti shkollë-shkollë, ka një rëndësi të veçantë për të marrë dhe dhënë përvoja në fushën e arsimit. Dalja jashtë kuadrit dhe këmbimi i përvojave shkollë-shkollë bartë në vete një nga format më bindëse për të sjellë ndryshime të dëshirueshme në shkollë. Shkollat, në fakt, kanë shumë të përbashkëta, por ndodh të kenë edhe dallimet. Konteksti i dallimeve, nxitë për të bërë më shumë në avancimin e cilësisë së një shkolle mbi bazën e praktikave të mira të një shkolle tjetër. Kësisoj, pengesat dhe përparësitë e një shkolle, nuk do të thotë se janë të njëjta për shkollën tjetër, prandaj këmbimi i informatave shkollë-shkollë lehtëson zgjidhjen e problemeve reciproke.

Ky partneritet, me Shkollën Fillore të Mesme të Ulët “Ibrahim Mazreku” në Malishevë, në veçanti me drejtorin e shkollës Z. Januz Mazreku dhe Shkollës FMU “Beqir Gashi” në Rrezor, po thellohet në vazhdimësi.
Duke parë nevojën, për pasurimin e Bibliotekës së Shkollës në Rrezor, Shkolla “Ibrahim Mazreku”, përkatësisht, drejtori i kësaj shkolle, Z. Januz Mazreku, sot ka dhuruar 30 libra.
Drejtori i SHFMU “Beqir Gashi”, Z. Alush Kryeziu, ka shprehur falënderim dhe ka vlerësuar këtë dhuratë si shumë të çmuar.

Në Shkollën e Muzikës "Prenke Jakova" në Gjakovë, u organizua ceremonia e ndarjes së licencave të mësimdhënësve për Regjionin e Arsimit të Gjakovës, që pëfshinë komunat: Gjakovë, Malishevë dhe Rahovec.
Në këtë ngjarje të rëndësishme, për arsimin e Regjionit të Gjakovës, ka marrë pjesë ministri Ramë Buja, zëvendësministri i MASHT-it dhe njëherësh kryetar i këshillit shtetëror për licencimin e mësimdhënësve, Nehat Mustafa, zyrtarë të lartë të MASHT, kryetari i Sindikatës së Arsimit, Ali Shabani, drejtorë të DKA, stafi i Regjionit Arsimor të Gjakovës, drejtor shkollash, mësimdhënës etj..

Ministri i Arsimit, z. Ramë Buja, ka përshëndetur të pranishmit dhe ka potencuar se:  “angazhimi Ministrisë së Arsimit, Shkencës dhe Teknologjisë ka qenë maksimal  dhe do të vazhdojë të jetë edhe në të ardhmen, sepse ne gjer me sot kemi shpërndarë afër 13 mijë licenca, na kanë mbetur apo janë në proces  edhe 6 mijë të tjera"...
Në ketë ceremoni nga Ministri Buja u shpërndan licencat për mësimdhënësit. Nga shkolla “Beqir Gashi”, mori licencën Mejreme Kryeziu.
Urime!

Projekti "Kosovision Kontest 5", sot në hotelin "Emerald" në Prishtinë, ka  organizuar ceremoninë përmbyllëse për vitin shkollor 2012/2013. Në këtë manifestim përmbyllës foli edhe Agim Berdynaj, drejtor i Departamentit për Zhvillim të Arsimit Parauniversitar në MASHT, ai duke folur për rëndësinë e këtij projekti ka potencuar se ky projekt do të hyjë në shkollat tona edhe si lëndë zgjedhore…

>>>>> Video <<<<
Në këtë ceremoni ishte prezent edhe zonja Katherina Washington, (udhëheqëse e projektit Kosovision Kontest). Për projektin, që nxitë imagjinatën për të projektuar të ardhmen e Kosovës, ka folur zonja,  Ardita Kabashi – Hima (koordinatore e Projektit). 
Për shkollat fituese, të këtij projekti me vlerë, janë ndarë mirënjohje. Shkolla "Beqir Gashi", si fituese e projektit “Biblioteka e Shkollës”, në këtë ceremoni përmbyllëse në shortin e hedhur sot, pati fatin të fitojë edhe një pako me mjete didaktike-mësimore që janë mjaft të nevojshme për këtë shkollë…
Mësuesja, Servete Gashi, dhe klasa e pestë më këtë projekt kanë sjellë ndryshimin e dëshirueshëm, Bibliotekën e Shkollës, andaj drejtori i shkollës, Alush Kryeziu, ka shprehur mirënjohje për rezultatet e arritura.

Në Qendrën për Zhvillimin Profesionale në Malishevë, sot ka përfunduar seminari i katërt për Udhëheqje Arsimore. Në këtë program po marrin pjesë drejtorë shkollash të komunës së Malishevës. Lehtësues apo facilitatorë për bartjen e informacioneve në fushën e Udhëheqjes Arsimore janë: Diana Qarkaxhija dhe Nehat Duraku. Ky program realizohet nga Ministria e Arsimit, Shkencës dhe Teknologjisë (MAShT) në bashkëpunim me donatorët BE-në dhe USAID-in.

Sot, një informacion shtesë e solli edhe Prof. Osman Buleshkaj. Ai duke folur rreth rëndësisë së seminareve, që kanë të bëjnë  me udhëheqjen bashkëkohore e cilësore në arsim, theksoi se; drejtorët me këtë program trajnimi do të avancohen për udhëheqje cilësore arsimore dhe në anën tjetër do të kenë disa privilegje edhe në studimet Master në Fakultetin e Edukimit në programin Udhëheqje Arsimore.

Karvani i shkrimtarëve për fëmijë “Agim Deva” , sot ka vizituar shkollën “Beqir Gashi”. Drejtori i shkollës ka falënderuar shkrimtarët që në rrugëtimin e tyre kanë përzgjedhur të vizitojnë shkollën “Beqir Gashi”. Është kënaqësi që fëmijët të kenë në mesin e tyre shkrimtarët, ata që me fuqinë e fjalës edukojnë breza të tërë…
Drejtori i shkollës, Alush Kryeziu, ka falënderuar drejtorin e Karvanit të Shkrimtarëve, z. Xhevat Syla, pastaj edhe shkrimtarët: Ibrahim Kadriu, Jonuz Fetahu, Arif Demolli, Avdi Shala, Gani Xhafolli si dhe drejtoreshën e shkollës “Imer Krasniqi”, zonjën Fatime Krasniqi.

>>>> Foto >>>>

Ora letrare filloi me leximin e poezive, të nxënësve të shkollës sonë dhe më pas lexuan poezi për fëmijë edhe shkrimtarët. Emocione mbresëlënëse skaliti, shkrimtari Gani Xhafolli, i cili aktroi dhe bëri që të shndritë buzëqeshja dhe gëzimi në fytyrat e nxënësve.
Nuk munguan edhe recitimet e nxënësve, si dhe një këngë kushtuar Beqir Gashit dhe dëshmorëve tjerë,  që u këndua bukur nga Brendon Kryeziu shoqëruar nga nxënësit Agon e Bleon Kryeziu.

Në fund të këtij evenimenti të rrallë, drejtori i Karvanit të Shkrimtarëve “Agim Deva”, z. Xhevat Syla, ka dhuruar libra për Bibliotekën e Shkollës.

Eskursioni me dy klasat e nënta

Nxënës e mësimdhënës të shkollës sonë, kanë përkrahur aktivitetin e iniciativës qytetare “Ta pastrojmë Kosovën”. Ky aksion është mbështetur edhe nga MASHT dhe DKA e Malishevës dhe sipas planifikimit shkolla jonë këtë aktivitet e ka filluar në ora 10:00 deri në orën 12:00.

Drejtori i Drejtorisë për Arsim në Komunën e Malishevës, Z. Isuf Morina, pasuroi Bibliotekën e Shkollës me kompletin e veprave të simbolit të rezistencës së gjallë, udhërrëfyesit, mësuesit dhe frymëzuesit të kombit për liri, shkrimtarit të mirënjohur, Adem Demaçi. Kompleti përfshin veprat: Fërkime, Gjarpijtë e gjakut, Libër për Vet Mohimin, Heli e Mimoza, Nëna Shegë e pesë gocat, Shkrumbnajë e dashur,  Dashuria Kuantike e Filanit, Alb Prometeu, Politika dhe Pushka dhe Tung vargu im.

…Filozofi më i madh idealist, gjerman, Georg Vilhelm Fridrih Hegel, në veprën madhore “Fenomenologjia e shpirtit” në kapitullin, "Perënditë dhe njerëzit", ndër të tjera ka shënuar: "Forcat e përgjithshme disponojnë në vetvete shenjën e individualitetit, e cila është e lidhur me principin e veprimit. Nga kjo del se vepra e tyre manifestohet si veprim i lirë, i cili përgjithësisht rrjedhë prej tyre. Kështu kanë vepruar perënditë, kështu veprojnë edhe njerëzit".( Hegel Fenomenologjia e shpirtit, BIGZ 1974 faqe 420.)
Drejtori i shkollës, Alush Kryeziu, ka falënderuar drejtorin e DKA-së, z. Isuf Morina për këtë dhuratë me vlerë të veçantë, që inspiron gjithë brezat për dashurinë ndaj Atdheut.

"Shkollës Fillore “Beqir Gashi”, në Rrezor (Mleqan) i mungon biblioteka. Nxënësit e klasës së pestë dhe mësuesja Servete Gashi, kanë arritur të fitojnë në garën e madhe në nivel vendi, në Projektin “Kosovision Kontest 5”. Në këtë garë, që ka synim planifikimin e projekteve, kjo klasë dhe mësuesja e tyre kanë fituar projektin dhe një shumë prej 500 €. Pikërisht, kanë fituar me Projektin “Biblioteka e Shkollës”.
Synimi kryesor i nxënësve të kësaj klase ka qenë që idetë e tyre të ngulmojnë në projektin për bibliotekën e shkollës, e cila i mungonte shkollës. Ata kanë arritur t'i sigurojnë raftet për libra, kanë marrë premtime nga komuniteti i prindërve, nxënësve e mësimdhënësve, se do të ndihmohen për të realizuar këtë projekt me vlerë.
Megjithatë, nxënësit kanë vlerësuar se edhe partnerë tjerë mund të ndihmojnë në Projektin e tyre, ata ndër partnerë të shkollës, kanë identifikuar edhe ProCredit Bank – Dega në Malishevë…" – Thuhet ndër të tjera në propozimin e klasës së pestë drejtuar bankës, ProCredit Bank – Dega në Malishevë, pra duke ftuar, me zërin fëmijëror, që kjo bankë të ndihmojë me libra Bibliotekën e Shkollës….

Pikërisht, sot ProCredit Bank – Dega në Malishevë, i dhuroi Bibliotekës së Shkollës 130 libra. Alush Kryeziu, drejtor i Shkollës FMU "Beqir Gashi", në Rrezor, ka falënderuar drejtoreshën e ProCredit Bank – Dega në Malishevë, Znj. Adelina Haxhikadrija dhe zyrtaren e kësaj banke,Znj. Zana Lleshi, të cilat me angazhimin e tyre, dërguan zërin e fëmijëve atje ku dëgjohet, prandaj, ProCredit Bank, do të jetojë gjatë në kujtesën e shkollës sonë…
Sinqerisht, Ju falënderojmë!

Shtëpia Botuese “Libri Shkollor” ka pasuruar Bibliotekën e Shkollës edhe me 110 libra. Kjo dhuratë për shkollën tonë ka vlerë dhe dëshmon se Projekti i klasës së pestë “Kosovision Kontest 5” do të jetë një proces veprimesh me synim që Biblioteka e Shkollës të pasurohet me sa më shumë libra.

Ne falënderojmë Shtëpinë Botuese “Libri Shkollor” dhe jemi të lumtur për këtë dhuratë!